kis se vafā kī hai umiid kaun vafā-shi.ār hai
ai mire be-qarār dil kis liye be-qarār hai
sun to rahe haiñ der se shor bahut bahār kā
jaane kahāñ khile haiñ phuul jaane kahāñ bahār hai
kyuuñ na tire ḳhayāl meñ zamzama-ḳhvāñ guzar chaleñ
yuuñ bhī hamārī raah meñ gardish-e-rozgār hai
raat se ham nahīñ udaas raat udaas hī sahī
raat to sub.h ke liye vaqfa-e-intizār hai
ab bhī mazāq-e-dard se merī shaboñ meñ hai gudāz
mere laboñ pe aaj bhī naġhma-e-husn-e-yār hai