miTTī tire mahakne se mujh ko gumān hai
bārish kī buuñd buuñd meñ ik dāstān hai
ye sochte ho kyuuñ ki ḳhudā bas tumheñ milā
dekho jahāñ zamīñ hai vahāñ āsmān hai
lagtā hai ghar vahī jahāñ aapas meñ pyaar ho
varna to log rahte haiñ aur ik makān hai
āñkhoñ kī bāt-chīt meñ paḌnā ye soch kar
nazroñ ke len-den meñ dil kā ziyān hai
hairat hai kaise phuul se ḳhushbū huī judā
mauqa.a mile to sochnā kyā darmiyān hai
shāyad ki aur bhī kahīñ bastī hai zindagī
lagtā hai aur bhī kahīñ aisā jahān hai
tum hī kaho ki vaqt se kyuuñ haar maan luuñ
jab ruuh meñ umañg hai dil bhī javān hai
'anvār' bazm hai sajī ho jaa.e shā.erī
urdu se ham ko ishq hai apnī zabān hai