ishq vahshī hai jahāñ dekhegā

husn ko siine se lipTā legā

ġham agar saath na terā degā

phir tujhe koī nahīñ pūchhegā

jaag uTTheñgī purānī yādeñ

tū magar ḳhvāb-e-girāñ chāhegā

dil meñ tūfān uTheñge lekin

ek pattā bhī nahīñ larzegā

har taraf chhā.egī vo ḳhāmoshī

apnī āvāz se tū chauñkegā

inhī Thahre hue lamhoñ kā ḳhayāl

dil se tūfāñ kī tarah guzregā

na baseñge ye ḳharābe dil ke

koī muḌ kar na idhar dekhegā

ai mire husn-e-gurezāñ kab tak

tū mirī qadr na pahchānegā

mujhe zarra na samajhne vaale

tū sitāroñ meñ mujhe DhūñDegā

mujh se katrā ke guzarne vaale

tū mirī ḳhaak ko bhī chūmegā