bikhre hue tāroñ se mirī raat bharī hai

ye nuur hai yā nuur kī daryūza-garī hai

hai aaj bhī pahlū meñ vahī zaḳhm-e-bahārāñ

ab tak mirī āñkhoñ meñ har ik shāḳh harī hai

duniyā meñ añdheroñ ke sivā aur rahā kyā

ik terī tamannā so charāġh-e-saharī hai

ab saath na de pā.eñge TuuTe hue baazū

uḌte hue lamhoñ se mirī ham-safrī hai

har lahza badaltī huī āñkhoñ pe na jaao

dil ke liye ummīd-e-fazā be-ḳhabarī hai

jalve kī basīrat ko samajhtī nahīñ āñkheñ

ā.īne kā maqdūr pareshāñ-nazarī hai

uḌte hue aate haiñ abhī sañg-e-tamannā

aur kār-gah-e-dil kī vahī shīshagarī hai

chup-chāp darīchoñ kī taraf dekhte phirnā

zinda haiñ to 'shahzād' yahī dar-badrī hai