bhaTaktī haiñ zamāne meñ havā.eñ
kise āvāz deñ kis ko balā.eñ
ye dil kā shahr mushkil se basā thā
chalo is shahr meñ ab ḳhaak uḌā.eñ
kabhī duniyā par us ke raaz kholeñ
kabhī apnī bhī āgāhī na paa.eñ
kabhī shor-e-qayāmat se khule aañkh
kabhī pattā hile aur chauñk jaa.eñ
mirī duniyā meñ rahnā chāhtī haiñ
purānī sohbatoñ kī apsarā.eñ
mire kānoñ meñ basnā chāhtī haiñ
ga.e-guzre zamānoñ kī sadā.eñ