ai dil-e-dard-āshnā husn se rasm-o-rāh kar

ishq hai bā.is-e-najāt shauq se to gunāh kar

lutf bhī gāh-gāh kar zulm bhī be-panāh kar

jaise bhī tujh se ho sake mujh se magar nibāh kar

mere savāl-e-vasl par aaj vo mujh se kah ga.e

tū abhī chand roz aur hijr meñ aah aah kar

husn tire huzūr ḳhud aa.e ba-iztirāb-e-dil

ai dil-e-dard-āshnā aisī bhī ek aah kar

shauq hai gar vaqār kā gulshan-e-rozgār meñ

phūloñ ke saath hī 'azīz' kāñToñ se bhī nibāh kar