abr chhā.egā to barsāt bhī ho jā.egī

diid hogī to mulāqāt bhī ho jā.egī

ai dil-e-husn-e-talab mashq-e-tasavvur tū baḌhā

phir jo chāhegā vahī baat bhī ho jā.egī

sar jhukā.e hue baiThe ho abas bāda-kasho

jaam uThāoge to barsāt bhī ho jā.egī

aaj us ne na.e andāz se dekhā hai mujhe

ġhāliban aaj koī baat bhī ho jā.egī

be-ḳhudī sirf dalīl-e-ġham-e-pinhāñ hī nahīñ

ek din kāshif-e-hālāt bhī ho jā.egī

bul-havas dahr ke rañgīn manāzir se na khel

din huā hai to yahāñ raat bhī ho jā.egī

jaan de kar tirī mahfil meñ kabhī jān-e-'azīz'

jaur kī tere mukāfāt bhī ho jā.egī