apne afkār-o-andāz nayā detā huuñ
ḳhushk manzar meñ hasīñ rañg milā detā huuñ
kitnā hotā hai mire dil ko ḳhushī kā ehsās
koī paudā jo sar raah lagā detā huuñ
vaise to saare zamāne se chhupā hai mirā haal
tum agar pūchh rahe ho to batā detā huuñ
roz hotī hai havāoñ se laḌā.ī merī
roz dahlīz pe ik sham.a jalā detā huuñ
kyā diyā mujh ko kisī ne hai alag baat magar
dekhnā ye hai zamāne ko maiñ kyā detā huuñ