chāhā hai ajab Dhañg se chāhat bhī ajab hai

mahbūb ajab hai ye mohabbat bhī ajab hai

pallū mirā thāmā hai ka.ī baar ḳhirad ne

par in dinoñ jazboñ kī baġhāvat bhī ajab hai

jakḌā hai tirī yaad ne afkār ko mere

hamdam tire jazbāt meñ shiddat bhī ajab hai

qurbat ke hasīñ phuul mirī ruuh pe vaare

kyā ḳhuub saḳhī hai ye saḳhāvat bhī ajab hai

ik āriz-e-gul par jamā shabnam sā vo qatra

kirnoñ se zarā qabl rifāqat bhī ajab hai

lahja tirā dhakkā huā lagtā hai ġhazab kā

ġhusse-bhare lahje meñ harārat bhī ajab hai

chehra tirā taptā huā dikhtā hai tapish se

mastī-bhare nainoñ meñ sharārat bhī ajab hai

baazī kabhī haarī nahīñ zālim ne anā kī

chāleñ bhī ajab us kī siyāsat bhī ajab hai

ḳhud qaid-e-vafā kaaT ke dī us ko rihā.ī

'bāno' ye tire dil kī adālat bhī ajab hai