zindagī se hasīñ udāsī hai

ye mirī ham-nashīñ udāsī hai

kab se pindār meñ muqayyad hai

kaisī parda-nashīñ udāsī hai

lahza lahza use kashīd karo

ki mai-e-añgbīñ udāsī hai

jur.a jur.a pilā mujhe saaqī

man hiran sātgīñ udāsī hai

ka.aba-e-dil meñ hai jo mahv-e-tavāf

jahāñ tāb-e-jabīñ udāsī hai

parbatoñ vādiyoñ meñ bastī hai

jañgaloñ kī makīñ udāsī hai

vo tah-e-āb jal-parī sī hai

merī sahrā-nashīñ udāsī hai

dekh kar lā rahī hai hastī meñ

jān-e-jāñ jā-guzīñ udāsī hai

sun adam se vajūd tak har jā

ḳhānumāñ meñ makīñ udāsī hai

jāda-o-sañg-mīl-o-maskan meñ

rahbaroñ kā yaqīñ udāsī hai

diip bīm-o-rajā kā jaañ gul ho

dekhnā tum vahīñ udāsī hai

zarb ik ḳhol kī fasīloñ meñ

hāshiyoñ ke qarīñ udāsī hai

jauhar-e-hast mirzā-'ġhālib' thī

aaj ḳhāk-e-barīñ udāsī hai

vaañ ḳhushī kī numū muhāl sī hai

us ke dil kī zamīñ udāsī hai