maiñ rivāyat huuñ ek bhūlī huī
aur tū jiddatoñ meñ rahtā hai
merī āñkheñ savāl kartī haiñ
kyā ḳhudā manzaroñ meñ rahtā hai
sā.ateñ raqs kar rahī haiñ magar
merā dil uljhanoñ meñ rahtā hai
parcham-e-jañg jhuk gayā lekin
vasvasa sā diloñ meñ rahtā hai
go charāġhāñ kiye ga.e ḳheme
par añdherā diloñ meñ rahtā hai
aao maujoñ se pūchh kar aa.eñ
chāñd kin sāhiloñ meñ rahtā hai