maiñ intihā-e-yās meñ tanhā khaḌā rahā
saaya mirā sharīk-e-safar DhūñDhtā rahā
phailī thī chāroñ samt siyāhī ajiib sī
maiñ haath meñ charāġh liye ghūmtā rahā
yaad us kī duur mujh ko sar-e-shām le ga.ī
maiñ saarī raat apne liye jāgtā rahā
ḳhud ko sameT lene kā anjām ye huā
maiñ rāste pe sañg kī sūrat paḌā rahā
kāġhaz kī naav gahre samundar meñ chhoḌ kar
maiñ us ke Dūbne kā samāñ dekhtā rahā
ThanDī havā ke lams kā ehsās thā ajiib
maiñ der tak shajar kī tarah jhūmtā rahā