dard Thahre to zarā dil se koī baat kareñ

muntazir haiñ ki ham apne se mulāqāt kareñ

din to āvāzoñ ke sahrā meñ guzārā lekin

ab hameñ fikr ye hai ḳhatm kahāñ raat kareñ

merī tasvīr adhūrī hai abhī kyā mālūm

kyā mirī shakl bigaḌte hue hālāt kareñ

aur ik taaza ta.āruf kā bahāna DhūñDeñ

un se kuchh un ke hī baare meñ savālāt kareñ

aao do-chār ghaḌī baiTh ke ik goshe meñ

kisī mauzūa pe iz.hār-e-ḳhayālāt kareñ