har ghaḌī har lamha uThte pattharoñ ke saath maiñ

TuuTe TuuTe kitne shīshoñ ke gharoñ ke saath maiñ

āñdhiyoñ ke dosh par sham.eñ jalātā roz o shab

qahr meñ biphrī havā ke lashkaroñ ke saath maiñ

sabza-zāroñ kī tamannā mujh meñ sargarm-e-safar safar

chilchilātī dhuup ke nāma-baroñ ke saath maiñ

rafta rafta shaam ke nā-mehrbāñ sailāb meñ

Dūbtā sā ujle ujle se paroñ ke saath maiñ

maiñ bhaTaktī ummatoñ kā ek dard-e-mushtarak

har zamāne meñ rahā paiġhambaroñ ke saath maiñ

dā.era-dar-dā.era chāroñ taraf bikhrā huā

ek samundar meñ sadā ke kañkaroñ ke saath maiñ

tū na jaane kin añdheroñ meñ chhupī baiThī huī

rāsta chuntā huā kitne Daroñ ke saath maiñ