shab-e-surūr na.ī dāstāñ visāl-o-firāq

na fikr-e-sūd-o-ziyāñ darmiyāñ visāl-o-firāq

maiñ us se baat karūñ bhī to kis havāle se

ki musta.ār makāñ meñ kahāñ visāl-o-firāq

usī ke naam pe jiite haiñ aur marte haiñ

yahī hai qissa-e-āshutagāñ visāl-o-firāq

vo kah gayā hai ki ā.ūñgā muntazir rahiyo

maiñ mubtalā-e-yaqīn-o-gumāñ visāl-o-firāq

vo paḌh rahā thā baḌe ġhaur se lahū kī sarisht

har ek buuñd kā sirr-e-nihāñ visāl-o-firāq

havā-e-sub.h na jaane kahāñ kahāñ le jaa.e

shab-e-murād shab-e-darmiyāñ visāl-o-firāq

maiñ us ko haath lagātā bhī kis tarah 'sahbā'

ajiib kashmakash-e-jāñ azaañ visāl-o-firāq