tujh se va.ada azīz-tar rakkhā
vahshatoñ ko bhī apne ghar rakkhā
apnī be-chehragī chhupāne ko
ā.īne ko idhar udhar rakkhā
ik tirā ġham hī apnī daulat thī
dil meñ poshīda be-ḳhatar rakkhā
aarzū ne kamāl pahchānā
aur ta.alluq ko taaq par rakkhā
is qadar thā udaas mausam-e-gul
ham ne āb-e-ravāñ pe sar rakkhā
apnī vāraftagī chhupāne ko
shauq ne ham ko dar-ba-dar rakkhā
kalma-e-shukr ki mohabbat ne
ham ko tamhīd-e-ḳhvāb par rakkhā
un ko samjhāne apnā harf-e-suḳhan
āñsuoñ ko payām par rakkhā