na ronā rah gayā baaqī na hañsnā rah gayā baaqī

ik apne aap par āvāze kasnā rah gayā baaqī

hamārī ḳhud-farāmoshī ye duniyā jaan jā.egī

zarā sā aur is daldal meñ dhañsnā rah gayā baaqī

havas ke naag ne din raat rakkhā apne changul meñ

bahut khelā hamāre tan se Dasnā rah gayā baaqī

kisī ke pyaar kā qissa adhūrā chhoḌ aa.e ham

ulajhnā ḳhud se aur har dam tarasnā rah gayā baaqī

kisī ko rashk aa.e kyuuñ na qismat par hamārī ab

ujaḌ aa.e haiñ har jānib se basnā rah gayā baaqī

kisī kī aañkh ne ḳhvāb-e-tahayyur taan rakkhā hai

'naved' us dām-e-yaktā.ī meñ phañsnā rah gayā baaqī