dasht tārīk thā aur ḳhvāb thā kaalā merā

raushnī detā rahā kaan kā baalā merā

kāTnā thā mujhe koh-e-shab-e-ġhurbat lekin

TuuT kar girtā rahā raah meñ bhālā merā

tujh ko ma.alūm na thī chāk-garebānī mirī

tū ne is dasht meñ kyoñ naam nikālā merā

ātishīñ rakhtī hai yaañ garmī-e-raftār mujhe

huuñ mah-e-ḳhāk-nashīñ gard hai haalā merā

lā-makāñ ne mujhe pheñkā hai makāñ kī had meñ

kis se paḌtā hai yahāñ dekhiye paalā merā

manzil-e-ishq na ḳhāk-e-shab-e-hijrāñ meñ milī

jāda-e-rañj meñ khiñchtā rahā naala merā

dast-e-shaffāf pe likhtā hai mirā naam koī

shāḳh-e-sarsabz pe khultā hai ujālā merā

mujh ko gar kār-e-mohabbat meñ zarā der huī

aa gayā karne koī aur izāla merā

paar kar jaa.e ye shāyad kisī din jū-e-ḳhāk

jism ko chāhiye kuchh aur sambhālā merā

shahr-e-maujūd dhuāñ hai mire bujhne se 'naved'

shahr-e-nābūd meñ rahtā hai ujālā merā