jism to miTTī meñ miltā hai yahīñ marne ke baad
us ko kyā ro.eñ jo martā hī nahīñ marne ke baad
farz par qurbān hone kā ik apnā husn hai
aur ho jaatā hai kuchh insāñ hasīñ marne ke baad
ik yahī ġham khaa.e jaatā hai ki us kā hogā kyā
kaun rakkhegā mirā husn-e-yaqīñ marne ke baad
ye mahal ye maal o daulat sab yahīñ rah jā.eñge
haath aa.egī faqat do gaz zamīñ marne ke baad
zindagī tak ke haiñ rishte zindagī tak hai bahār
tum kahīñ ai 'tarz' hoge vo kahīñ marne ke baad