māhaul sāzgār karo maiñ nashe meñ huuñ
zikr-e-nigāh-e-yār karo maiñ nashe meñ huuñ
ai gardisho tumheñ zarā tāḳhīr ho ga.ī
ab merā intizār karo maiñ nashe meñ huuñ
maiñ tum ko chāhtā huuñ tumhīñ par nigāh hai
aise meñ e'tibār karo maiñ nashe meñ huuñ
aisā na ho ki saḳht kā ho saḳht-tar javāb
yaaro sambhal ke vaar karo maiñ nashe meñ huuñ
ab maiñ hudūd-e-hosh-o-ḳhirad se guzar gayā
Thukrāo chāhe pyaar karo maiñ nashe meñ huuñ
ḳhud 'tarz' jo hijāb meñ ho us se kyā hijāb
mujh se nigāheñ chaar karo maiñ nashe meñ huuñ