mujh se āñkheñ laḌā rahā hai koī

mere dil meñ samā rahā hai koī

hai tirī tarah roz rāhoñ meñ

mujh se tujh ko chhuḌā rahā hai koī

phir hue haiñ qadam ye man man ke

paas apne bulā rahā hai koī

niklūñ har raah se usī kī taraf

rāste vo batā rahā hai koī

kyā nikal jā.ūñ ahd-e-māzī se

yaad bachpan dilā rahā hai koī

phir se ulfat nahīñ hai āsāñ kuchh

bhūle naġhme sunā rahā hai koī

dhaḌkaneñ tez hotī jaatī haiñ

mere nazdīk aa rahā hai koī

vo jo kahtā hai bhuul jā.ūñ ḳhalish

vaqt us par kaḌā rahā hai koī