kisī ne chāñd sūraj aur sitāre bech Daale haiñ
mohabbat bech Daalī ḳhvāb saare bech Daale haiñ
koī ummīd koī aasrā baaqī nahīñ chhoḌā
vafā ke pyaar ke saare sahāre bech Daale haiñ
bhañvar meñ chhoḌ dī kashtī hamāre nā-ḳhudāoñ ne
nigāhoñ ke sabhī raushan kināre bech Daale haiñ
hamārī aañkh se noche ga.e haiñ sab hasīñ manzar
nazar chhīnī ga.ī hai aur nazāre bech Daale haiñ
sitam to dekhiye un kā 'qamar' jo ham pe TuuTā hai
dar-o-dīvār beche ghar hamāre bech Daale haiñ