adhūrī qurbatoñ ke ḳhvāb āñkhoñ ko dikhā jaanā

hazāroñ dūriyoñ par ye tirā kuchh paas aa jaanā

udāsī ke dhuñdlakoñ kā dimāġh-o-dil pe chhā jaanā

nazar ke sāmne ik gum-shuda manzar kā aa jaanā

sunī hai maiñ ne akasr band darvāzoñ kī sargoshī

sadā.eñ chāhtī haiñ sab khulī saḌkoñ pe aa jaanā

tirī yādeñ ki is tūfān-e-zulmat meñ bhī raushan haiñ

huā mushkil havā ko in charāġhoñ kā bujhā jaanā

ḳhalā meñ Dūbtī sī āhaTeñ thiiñ kuchh jinheñ ham ne

safar meñ saath rakkhā manziloñ kā aasrā jaanā

maiñ tere saath huuñ to us kī ḳhushbū ke ta.āqub meñ

jahāñ tak jā sake ai sar-phirī mauj-e-havā jaanā

nazar us kī bhī ai 'maḳhmūr' dhokā khā ga.ī āḳhir

vahī thā āshnā chehra jise nā-āshnā jaanā