apnā bigḌā huā banāv liye

jī rahe haiñ vahī subhāv liye

shaam utrī hai phir ahāte meñ

jism par raushnī ke ghaav liye

sīdhī saadī sī raah thī mujh tak

tum ne nāhaq ka.ī ghumāv liye

dard ke qahr se laḌeñ kab tak

ik tire ruup kā alaav liye

log dariyā samajh rahe haiñ mujhe

mujh meñ sahrā hai ik bahāv liye

dil ne be-rañg hone se pahle

halke gahre ka.ī rachāv liye

tujh se kahnā thā kuchh pa lagtā hai

mar hī jā.eñge jī meñ chaav liye