hameñ raas aanī hai rāhoñ kī gaThrī
rakho paas apnī panāhoñ kī gaThrī
badal jaa.e kaash is hasīñ marhale par
hamārī tumhārī gunāhoñ kī gaThrī
mohabbat kī rāheñ thiiñ hamvār lekin
hamīñ Dho na paa.e nibāhoñ kī gaThrī
takalluf ke sāmān bikhre the bāham
so bāñdhe rahe ham bhī bāñhoñ kī gaThrī
ujāle ke haiñ in dinoñ daam ūñche
chalo luuT leñ rū-siyāhoñ kī gaThrī
dharī rah ga.ī munsif-e-dil ke aage
bayānoñ kī gaThrī gavāhoñ kī gaThrī
na uglī hī jaa.e na nigale bane hai
gale meñ phañsī ek aahoñ kī gaThrī
ye sūkhī huī fasl-e-ġham jī uThegī
agar khul ga.ī in nigāhoñ kī gaThrī
uTheñgī kisī roz sailāb ban kar
ye ābādiyāñ haiñ tabāhoñ kī gaThrī
mirī sīdhī saadī sī bātoñ pe mat jā
mirī zaat hai kaj-kulāhoñ kī gaThrī