lafz chunte hue tartīb na.ī lagtī hai

dil dukhāne kī ye tarkīb na.ī lagtī hai

merī tahsīñ se kiyā aap ne dānista gurez

kyuuñ qasīde meñ ye tashbīb na.ī lagtī hai

ab haqīqat kī tarah is ko bhī taslīm kareñ

zindagī kī koī tādīb na.ī lagtī hai

kuchh na.e ḳhvāb na.ī ḳhvāhisheñ dāman meñ liye

har na.e saal kī tarġhīb na.ī lagtī hai

un kī bātoñ pe siyāsat kā asar hai goyā

un kī har baat meñ takzīb na.ī lagtī hai

vaqt ke saath badal Daale haiñ ādāb-e-vafā

aap ke ishq kī tahzīb na.ī lagtī hai