ye jo chehre se tumheñ lagte haiñ bīmār se ham

ḳhuub ro.e haiñ lipaT kar dar-o-dīvār se ham

yaar kī aañkh meñ nafrat ne hameñ maar diyā

marne vaale the kahāñ yaar kī talvār se ham

ishq meñ hukm-udūlī bhī hameñ aatī hai

Talne vaale to nahīñ haiñ tire inkār se ham

rañj har rañg ke jholī meñ bhare haiñ ham ne

jab bhī guzre haiñ kisī dard ke bāzār se ham

bādshāh shā.ir-majnūñ sabhī aate haiñ yahāñ

lag ke baiThe haiñ 'vasī'-shāh ke darbār se ham