kyā jurm hamārā hai batā kyuuñ nahīñ dete

mujrim haiñ agar ham to sazā kyuuñ nahīñ dete

kyā jalva-e-ma.anī hai dikhā kyuuñ nahīñ dete

dīvār-e-hijābāt girā kyuuñ nahīñ dete

tum ko to baḌā nāz-e-masīhā.ī thā yaaro

bīmār hai har shaḳhs davā kyuuñ nahīñ dete

kis dasht meñ gum ho ga.e ahbāb hamāre

ham kaan lagā.e haiñ sadā kyuuñ nahīñ dete

kam-zarf haiñ jo pī ke bahut ke haiñ sar-e-bazm

mahfil se unheñ aap uThā kyuuñ nahīñ dete

kyuuñ haath meñ larza hai tumheñ ḳhauf hai kis kā

ham harf-e-ġhalat haiñ to miTā kyuuñ nahīñ dete

kuchh log abhī ishq meñ gustāḳh bahut haiñ

ādāb-e-vafā un ko sikhā kyuuñ nahīñ dete

naġhma vahī naġhma hai utar jaa.e jo dil meñ

duniyā ko 'hafīz' aap batā kyuuñ nahīñ dete