dil ne phir chāhā ujāle kā samundar honā

phir amāvas ko milā merā muqaddar honā

dosto maiñ to na mānūñgā vo hai ḳhushk-mizāj

us ne āñkhoñ ko sikhāyā hai mirī tar honā

aaj sunte haiñ vo mā.il-ba-karam aa.egā

ai mirī ruuh mire jism ke andar honā

mere hoñToñ pe jamī pyaas gavāhī degī

maiñ ne qatre ko sikhāyā thā samundar honā

mujh se is baar miloge to samajh jāoge

kaisā hotā hai kisī shaḳhs kā patthar honā