pūchheñ vo kaash haal dil-e-be-qarār kā

ham bhī kaheñ ki shukr hai parvardigār kā

lāzim agar hai shukr hī parvardigār kā

phir kyā ilaaj gardish-e-lail-o-nahār kā

sayyād bhī pahuñch gayā gul-chī bhī baaġh meñ

ai ham-safīr aa gayā mausam bahār kā

tadbīr kyā ho sabr-o-shakeb-o-qarār kī

vo tund-ḳhū hai bas kā na dil iḳhtiyār kā

kyūñ-kar miTe nadāmat-e-iz.hār-e-ārzū

aalam nazar meñ hai nigah-e-sharmsār kā

qānūn kis ne badlā hai qudrat kā shaiḳh-jī

daarū hai ab bhī mai hī ġham-e-rozgār kā

un nāmiyoñ ke hashr se ibrat-pazīr ho

baaqī nahīñ nishān bhī jin ke ġhubār kā

rakkhegā be-qarār tumheñ bhī tamām umr

marnā taḌap taḌap ke kisī be-qarār kā

be-laus ho havas se agar ishq ai 'vafā'

hai zikr-e-yār meñ bhī maza vasl-e-yār kā