aañkh se aañkh milātā hai koī

dil ko khīñche liye jaatā hai koī

vaa.e hairat ki bharī mahfil meñ

mujh ko tanhā nazar aatā hai koī

sub.h ko ḳhunuk fazāoñ kī qasam

roz aa aa ke jagātā hai koī

manzar-e-husn-e-do-ālam ke nisār

mujh ko ā.īna dikhātā hai koī

chāhiye ḳhud pe yaqīn-e-kāmil

hausla kis kā baḌhātā hai koī

sab karishmāt-e-tasavvur haiñ 'shakīl'

varna aatā hai na jaatā hai koī