tirī mahfil se uTh kar ishq ke māroñ pe kyā guzrī

muḳhālif ik jahāñ thā jaane bechāroñ pe kyā guzrī

sahar ko ruḳhsat-e-bīmār-e-furqat dekhne vaalo

kisī ne ye bhī dekhā raat bhar tāroñ pe kyā guzrī

sunā hai zindagī vīrāniyoñ ne luuT lī mil kar

na jaane zindagī ke nāz-bardāroñ pe kyā guzrī

hañsī aa.ī to hai be-kaif sī lekin ḳhudā jaane

mujhe masrūr pā kar mere ġham-ḳhvāroñ pe kyā guzrī

ye zāhid haiñ inheñ kyā tajraba ejāz-e-ulfat kā

ye to jannat meñ bhī pūchheñ gunahgāroñ pe kyā guzrī