zindagī un kī chaah meñ guzrī
mustaqil dard-o-āh meñ guzrī
rahmatoñ se nibāh meñ guzrī
umr saarī gunāh meñ guzrī
haa.e vo zindagī kī ik saa.at
jo tirī bārgāh meñ guzrī
sab kī nazroñ meñ sar-buland rahe
jab tak un kī nigāh meñ guzrī
maiñ vo ik rahrav-e-mohabbat huuñ
jis kī manzil bhī raah meñ guzrī
ik ḳhushī ham ne dil meñ chāhī thī
vo bhī ġham kī panāh meñ guzrī
zindagī apnī ai 'shakīl' ab tak
talḳhī-e-rasm-o-rāh meñ guzrī