dostoñ meñ vāqa.ī ye bahs bhī aksar huī

haar kis ke sar huī hai jiit kis ke sar huī

zehn be-paikar huā aur aql be-manzar huī

dil to patthar ho chukā thā aañkh bhī patthar huī

log kahte haiñ ki qadr-e-mushtarak koī nahīñ

is ḳharābe meñ to sab kī zindagī dūbhar huī

roz-o-shab aḳhbār kī ḳhabroñ se bahlātā huuñ jī

ye samajhtā huuñ ki ab to raushnī ghar ghar huī

zehn meñ aane lage phir nā-pasandīda ḳhayāl

vo kahānī kaise bhūleñ naqsh jo dil par huī

dukh-bharī āvāz suntā huuñ to hotā huuñ udaas

ye ḳhatā Thahrī to mujh se ye ḳhatā aksar huī

ik zamāne se to bas 'iqbāl' apnī zindagī

dard kā bistar huī ehsās kī chādar huī