pyaas jo bujh na sakī us kī nishānī hogī
ret par likkhī huī merī kahānī hogī
vaqt alfāz kā mafhūm badal detā hai
dekhte dekhte har baat purānī hogī
kar ga.ī jo mirī palkoñ ke sitāre raushan
vo bikharte hue sūraj kī nishānī hogī
phir andhere meñ na kho jaa.e kahīñ us kī sadā
dil ke āñgan meñ na.ī sham.a jalānī hogī
apne ḳhvāboñ kī tarah shāḳh se TuuTe hue phuul
chun rahī huuñ koī tasvīr sajānī hogī
be-zabāñ kar gayā mujh ko to savāloñ kā hujūm
zindagī aaj tujhe baat banānī hogī
kar rahī hai jo mire aks ko dhundlā 'sarvat'
maiñ ne duniyā kī koī baat na maanī hogī