vo ek nazar meñ mujhe pahchān gayā hai
jo biitī hai dil par mire sab jaan gayā hai
rahne lagā dil us ke tasavvur se gurezāñ
vahshī hai magar merā kahā maan gayā hai
thā saath nibhāne kā yaqīñ us kī nazar meñ
mahfil se mirī uTh ke jo anjān gayā hai
auroñ par asar kyā huā us hosh-rubā kā
bas itnī ḳhabar hai mirā īmān gayā hai
chehre pe mire dard kī parchhā.īñ jo dekhī
bedard mire ghar se pareshān gayā hai
is bhiiḌ meñ 'sarvat' nazar aane lagī tanhā
kis kūche meñ terā dil-e-nādān gayā hai