bahar-sūrat haiñ ham shīrīni-e-guftār ke sadqe
tire iqrār ke sadqe tire inkār ke sadqe
ḳhushā zauq-e-talab is hasrat-e-dīdār ke sadqe
hue haiñ bām-o-dar ke rauzan o dīvār ke sadqe
navāzish ho navāze gar nigāh-e-lutf se us ko
tirā bīmār terī nargis-e-bīmār ke sadqe
qadam le kar kaleje se lagāte haiñ kabhī us ko
kabhī hote haiñ ham chashm o lab o ruḳhsār ke sadqe
jahān-e-ārzū meñ husn kā bhī naam ho jaa.e
maza aa jaa.e vo gul bhī agar ho 'ḳhār' ke sadqe