phir ye mumkin hī nahīñ hai ki sambhālo mujh ko
ik zarā qaid se bāhar to nikālo mujh ko
is haqīqat kī bhī aamad ho mire hujre meñ
chhoḌ ke jaao kabhī ḳhvābo ḳhayālo mujh ko
jism ko dard meñ hañsne kā hunar aatā hai
iltijā ye hai ki patthar meñ na Dhālo mujh ko
maiñ ne pābandī lagā dī hai zabāñ par varna
mudda.ā chīḳh rahā hai ki uchhālo mujh ko
tab talak kūza-garo ḳhvāb hai ta.abīr mirī
jab talak puurī tarah toḌ na Daalo mujh ko
māvarā huuñ maiñ har ik lafz-e-suḳhan se jo mujhe
tum ko paḌhnā hai to phir soch meñ Dhālo mujh ko
lo maiñ kartā huuñ mirī ḳhaak tumhāre hī sipurd
jaisī darkār ho vaisā hī banā lo mujh ko
pahle malbe ko mire saaf karo uupar se
phir mirī ḳhaak ke nīche se nikālo mujh ko
āñkheñ neze pe Tike dekh ke apnī 'nāyāb'
bol uThe ḳhvāb bhī ab to ki na paalo mujh ko