koī baat aisī aaj ai merī gul-ruḳhsār ban jaa.e
ki bulbul bātoñ bātoñ meñ dam-e-guftār ban jaa.e
ayaañ ho jazb-e-shauq aisā hasīñ aa.eñ ziyārat ko
mirī turbat kā mela misr kā bāzār ban jaa.e
mire hañsne pe vo kahte haiñ aisā bhī na ho be-ḳhud
ki koī aadmī se qahqaha dīvār ban jaa.e
ta.ajjub kuchh nahīñ hai gar vafūr-e-soz-e-furqat se
mirā har mū-e-tan minqār-e-mausīqār ban jaa.e
Tahalte gar chale aa.eñ vo dāġhoñ ke tamāshe ko
abhī sarv-e-charāġhāñ merā jism-e-zār ban jaa.e
barahman shaiḳh ko kar de nigāh-e-nāz us but kī
gulū-e-zohd meñ tār-e-nazar zunnār ban jaa.e
agar ghar se ba-qasd-e-sair nikle vo kamāñ-abrū
to bahr-e-tā.ir-e-dil har mizha sūfār ban jaa.e
tabassum kar tamāshā dekh ke vahshat kā phir zālim
mirā chāk-e-garebāñ zaḳhm-e-dāman-dār ban jaa.e
yūñhī hañs hañs ke tum āshiq kā ronā dekhte jaao
ki har tār-e-nazar ik motiyoñ kā haar ban jaa.e
baḌhāo manzilat teġh adā kī tund-ḳhūī se
munāsib hai jo ye shamshīr jauhar-dār ban jaa.e
agar ā.īna-e-dil saaf ho husn-e-tavajjoh se
har ik āñkhoñ kā parda parda-e-asrār ban jaa.e
yahī hai ḳhūñ-bahā chal kar zarā kah do ishāre se
'habīb-e-ḳhasta kā marqad pas-e-dīvār ban jaa.e