mujh ko yaqīñ hai sach kahtī thiiñ jo bhī ammī kahtī thiiñ

jab mere bachpan ke din the chāñd meñ pariyāñ rahtī thiiñ

ek ye din jab apnoñ ne bhī ham se naata toḌ liyā

ek vo din jab peḌ kī shāḳheñ bojh hamārā sahtī thiiñ

ek ye din jab saarī saḌkeñ rūThī rūThī lagtī haiñ

ek vo din jab aao kheleñ saarī galiyāñ kahtī thiiñ

ek ye din jab jaagī rāteñ dīvāroñ ko taktī haiñ

ek vo din jab shāmoñ kī bhī palkeñ bojhal rahtī thiiñ

ek ye din jab zehn meñ saarī ayyārī kī bāteñ haiñ

ek vo din jab dil meñ bholī-bhālī bāteñ rahtī thiiñ

ek ye din jab lākhoñ ġham aur kaal paḌā hai aañsū kā

ek vo din jab ek zarā sī baat pe nadiyāñ bahtī thiiñ

ek ye ghar jis ghar meñ merā sāz-o-sāmāñ rahtā hai

ek vo ghar jis ghar meñ merī būḌhī naanī rahtī thiiñ