dil meñ mahak rahe haiñ kisī aarzū ke phuul
palkoñ pe khilne vaale haiñ shāyad lahū ke phuul
ab tak hai koī baat mujhe yaad harf harf
ab tak maiñ chun rahā huuñ kisī guftugū ke phuul
kaliyāñ chaTak rahī thiiñ ki āvāz thī koī
ab tak samā.atoñ meñ haiñ ik ḳhush-gulū ke phuul
mere lahū kā rañg hai har nok-e-ḳhār par
sahrā meñ har taraf haiñ mirī justujū ke phuul
dīvāne kal jo log the phūloñ ke ishq meñ
ab un ke dāmanoñ meñ bhare haiñ rafū ke phuul