khulā hai dar pa tirā intizār jaatā rahā
ḳhulūs to hai magar e'tibār jaatā rahā
kisī kī aañkh meñ mastī to aaj bhī hai vahī
magar kabhī jo hameñ thā ḳhumār jaatā rahā
kabhī jo siine meñ ik aag thī vo sard huī
kabhī nigāh meñ jo thā sharār jaatā rahā
ajab sā chain thā ham ko ki jab the ham bechain
qarār aayā to jaise qarār jaatā rahā
kabhī to merī bhī sunvā.ī hogī mahfil meñ
maiñ ye umiid liye baar baar jaatā rahā