maiñ kab se kitnā huuñ tanhā tujhe patā bhī nahīñ
tirā to koī ḳhudā hai mirā ḳhudā bhī nahīñ
kabhī ye lagtā hai ab ḳhatm ho gayā sab kuchh
kabhī ye lagtā hai ab tak to kuchh huā bhī nahīñ
kabhī to baat kī us ne kabhī rahā ḳhāmosh
kabhī to hañs ke milā aur kabhī milā bhī nahīñ
kabhī jo talḳh-kalāmī thī vo bhī ḳhatm huī
kabhī gila thā hameñ un se ab gila bhī nahīñ
vo chīḳh ubhrī baḌī der gūñjī Duub ga.ī
har ek suntā thā lekin koī hilā bhī nahīñ