kis ko ham-safar samjheñ jo bhī saath chalte haiñ

āshnā se lagte haiñ ajnabī nikalte haiñ

ai mirī sharīk-e-ġham kaash tū samajh saktī

kitne an-bahe aañsū qahqahoñ meñ Dhalte haiñ

raat kī ḳhamoshī meñ jab koī nahīñ hotā

dil se biitī yādoñ ke qāfile nikalte haiñ

tah-ba-tah añdheroñ tak raushnī to phailegī

ek raat kī zid meñ sau charāġh chalte haiñ

manziloñ ke dhoke meñ sāthiyo na ruk jaanā

manziloñ se aage bhī rāste nikalte haiñ