shikasta ḳhvāb mire ā.īne meñ rakkhe haiñ
ye kyā azaab mire aa.ine meñ rakkhe haiñ
abhī to ishq kī parteñ khuleñgī tah-dar-tah
abhī hijāb mire aa.ine meñ rakkhe haiñ
paḌhā rahe ho mujhe tum ye kis jahāñ ke sabaq
mire nisāb mire aa.ine meñ rakkhe haiñ
tumhāre ḳhvāb salāmat haiñ ujḌī āñkhoñ meñ
jo zer-e-āb mire aa.ine meñ rakkhe haiñ
tumhāre hijr meñ guzre hue sabhī lamhe
mirī kitāb mire aa.ine meñ rakkhe haiñ