safar meñ hī chhupī un kī ḳhushī hai

musāfir ko masāfat bandagī hai

nazar sab aa rahā hai saaf kaalā

añdheroñ meñ bhī kitnī raushnī hai

pareshāñ huuñ maiñ din meñ raushnī se

to shab meñ chāñdnī pīchhe paḌī hai

udāsī hai to phīkā rañg lekin

ye mujh tasvīr kā ik rañg hī hai

ḳhatā is meñ nahīñ hai ā.īne kī

ye saarī gard chehroñ par jamī hai

badan merā hai ik vīrāñ makāñ, par

makīñ ban kar ye vahshat rah rahī hai

gale lag kar mire sahrā jo royā

jo baaqī tishnagī thī bujh ga.ī hai

zamīñ ke paañv bhārī haiñ falak se

ye ukhḌī an-manī rahne lagī hai