khule meñ chhoḌ rakhā hai magar salīqe se
bañdhe hue haiñ parindoñ ke par salīqe se
hamīñ pe farz nahīñ sirf haq paḌosī kā
tumheñ bhī chāhiye rahnā udhar salīqe se
kabhī se hālat-e-bīmār-e-dil sambhal jaatī
ilaaj karte agar chāra-gar salīqe se
hamāre chāhne vaale bahut hī nāzuk haiñ
hamārī maut kī denā ḳhabar salīqe se
bahut sī mushkileñ haa.el haiñ raah meñ lekin
tamām umr kiyā hai safar salīqe se