apne hoñToñ se aazmā ke to dekh
mere ash.ār gungunā ke to dekh
dhaḌkanoñ kī zabān urdu hai
mere dil meñ kabhī samā ke to dekh
lutf kyā aatā hai sambhalne meñ
mere sañg tū bhī laḌkhaḌā ke to dekh
kyuuñ tirā aks ban gayā huuñ maiñ
rū-ba-rū aa.ine ke aa ke to dekh
kar ke dariyā ko paar merī tarah
tū bhī kashtī kabhī jalā ke to dekh
shahr se duur chal ke gaañv meñ
ek chhoTā sā ghar basā ke to dekh