tumheñ tum se churāne aa ga.e haiñ
mohabbat ko baḌhāne aa ga.e haiñ
hañsī ko qaid se āzād kar do
ye dekho muskurāne aa ga.e haiñ
abhī to ham se milne tum chale aao
ki ab mausam suhāne aa ga.e haiñ
ġhazal likkhī hai yādoñ meñ tumhārī
vahī shab bhar sunāne aa ga.e haiñ
gile-shikve bahut the darmiyāñ to
ki ab saare miTāne aa ga.e haiñ
ġhamoñ kā bojh hai sar par tumhāre
abad tak ham uThāne aa ga.e haiñ
ka.ī alfāz siine meñ dabe the
sabhī tum ko batāne aa ga.e haiñ
mohabbat ke taqāze dushmanoñ meñ
ye 'shīrīñ' ham nibhāne aa ga.e haiñ