tujhe sunā.ūñ ġhazal yā sunā.ūñ apnā ġham
zarā irāda batā tū bhī kuchh ai mere sanam
maiñ shāhzādī huuñ alfāz ke riyāsat kī
ḳhazāna sher-o-suḳhan kā kabhī na hogā kam
nibhā rahe haiñ sabhī se ḳhulūs ke rishte
isī se baaqī hai duniyā ke bāzūoñ meñ dam
jo ham se raat meñ tanhā.ī ham-kalām huī
sañvar gayā mire jazboñ kā aaj saarā ḳham
mujhe pasand nahīñ be-hayā.ī duniyā kī
koī sameT le aa kar tamīz kā yuuñ bharam
bayān kar diyā jazbāt maiñ ne bhī 'shīrīñ'
hunar ye apnā nahīñ hai ḳhudā kā ḳhaas karam